horizonte  ye un local na rede, aonde se splora l’antigo i nobre

tema de la paisaige na arte, specialmente na pintura ou zeinho.

 

La paisaige na arte ye bista eiqui, de bários ángulos, zde percípios básicos, técnicas, bariaçones a eisemplos.

 

Participaçones ou comentairos son bienbenidos. Basta antrar an cuntato

atrabeç de la seguinte morada eiletrónica: adc.eu@sapo.pt.

 

 

 

percípios básicos

Para la eisecuçon de ua paisaige nua pintura ou zeinho, bárias

cunsidraçones dében ser abordadas, cumo: la composiçon, l’eifeito de la

çtáncia, l rabisco, las técnicas de pintura ou zeinho, etc.

 

 

 

la composiçon

La composiçon na paisaige eirá detreminar la dinámica persente na

eimaige.

 

Cumo eisemplo desso, tenemos ambaixo, trés bariaçones de un sencielho

rabisco de ua paisaige. Ne l purmeiro, l percipal eilemiento, ua arble, ye

cortada pul lemite de l campo bisual. Assi, la dinámica ambolbente de

l’arble ye quebrada, ouriginando ua cierta tenson; para para alhá de criar

un cierto mistério, siempre presente quando l’artista deixa parte dua

eimaige ausente.

 

 

Ne l segundo rabisco, l percipal eilemiento, ua arble, ye cortada pul lemite de l campo bisual, mas agora ne l lemite de la própia arble. L resultado ye un outro tipo de tenson. La dinámica ambolbente de l’arble ye quebrada, mas quaije que nun ye, resultando nua ambiguidade. L mistério ye menor an relaçon al purmeiro rabisco. La tenson ye mais nerbosa.

 

 

Ne l terceiro rabisco, l percipal eilemiento, ua arble, nun ye cortada pul

lemite de l campo bisual. L resultado ye l eiquilíbrio, la stabelidade. La

dinámica ambolbente de l’arble nun ye quebrada, mas por outro lado, nun hai tenson.

 

 

 

 

 

 

 

tipos de paisaiges

Dando liberdade a l’eimaginaçon, ye possible zambolber muitos i sóticos

tipos de paisaiges. Mas antes, tenemos ls mais tradecionales, cumo por

eisemplo: paisaige marítima, paisaige ourbana, ou simplesmente paisaige campestre.

 

 

 

paisaige campestre

La forma mais tradecional de la paisaige na arte bidimensional, la paisaige campestre ten ls sous própios eilemientos básicos: ua bista alargada de la natureza campestre, l cielo, un cuidado cula composiçon, ua cierta spiritualidade cula natureza, antre outros. Las figuras, se persente, son normalmente eilemientos secundairos.

 

Las Papoilas1

de Claude Monet

ólio subre tela, 50x65 cm

 

niebe i paisaige

de António de Campos

acrílico subre tela, 30x30 cm

 

 

 

paisaige marítima

Ua outra forma tradecional de la paisagem na arte bidimensional, la paisaige marítima troca la tierra pul mar. Fura diesso, mantén muitos de ls eilemientos básicos persentes na paisaige campestre. La persença de nabios ye muito quemun.

 

L Temeraire Lhutador2

de J. M. W. Turner

ólio subre tela, 91x122 cm

 

bela

de António de Campos

sferográfica, 10x10 cm

 

 

 

 

paisaige celhestre

Entrando nua forma menos tradecional de la paisaige na arte bidimensional, la paisaige celhestre abdica de qualquiera refréncia de tierra. Ls eilemientos básicos persentes yá son muito manipulados pul artista, an cumparaçon cum tipos mais tradecionales de la paisaige. La persença de lo cielo ye fundamental.

 

poner de l sol

de António de Campos

acrílico subre tela, 30x30 cm

 

 

 

 

paisaige abstrata

Ua forma nada tradecional de la paisaige na arte bidimensional, la paisaige abstrata puode abdicar de qualquiera refréncia als eilemientos básicos persentes ne ls tipos mais tradecionales de la paisaige. Inda assi, para ser cunsidrada inda ua paisaige, la paisaige abstrata debe dar qualquiera refréncia, que justifica la sue ancluson ne l mundo de la paisaige.

 

strutura de l canal

de António de Campos

acrílico subre tela, 40x40 cm

 

 

 

NOTAS

1.  Eimaige oubtida an 10 de dezembre de 2013, ne l sítio http://en.wikipedia.org/wiki/Monet.

2.  Eimaige oubtida an 10 de dezembre de 2013, ne l sítio http://en.wikipedia.org/wiki/File:Turner.